গাড়ী আছে বোকাখাতত, কিন্তু টোল টেক্স কাটিছে সোণাপুৰ টোল গে’টত। এনেধৰণৰ ঘটনা পূৰ্বতেও সংঘটিত হৈছে। তেনেই এক ঘটনা পুনৰ সংঘটি হ’ল বোকাখাতত। গাড়ী ঘৰত থকাৰ সময়তে কৰ্তন কৰা হ’ল টোল টেক্স। বোকাখাতৰ প্ৰাঞ্জুমণি দত্ত নামৰ যুৱকজনৰ AS 02 S 0225 নম্বৰৰ নিচা গ’ প্লাছ বাহনখন ঘৰত থকাৰ সময়তে গাড়ীখনৰ বিপৰীতে কৰ্তন কৰা হয় টোল টেক্স। বাহনখনত ঘৰত থকাৰ সময়তে মঙলবাৰে বিয়লি ৪.২৪ বজাত সোণাপুৰ টোল গে’টেৰে পাৰ হোৱা দেখুৱাই তাৰ বাবদ ১৩৫ টকা বেংক একাউণ্টৰ পৰা কৰ্তন কৰাৰ অভিযোগ তুলিছে লোকজনে।
ঘৰত থকাৰ সময়তে এইদৰে টোল টেক্স কৰ্তন কৰাক লৈ হতভম্ব হৈ পৰে লোকজন। লগে লগে ভুক্তভোগী লোকজনে বোকাখাত থানাত বিষয়টো সন্দৰ্ভত এখন এজাহাৰ দাখিল কৰে। কোনো দুষ্ট চক্ৰই এনেধৰণৰ দুষ্কাৰ্য সংঘটিত কৰাৰ সন্দেহ প্ৰকাশ কৰে লোকজনে।