টিভিৰ এক বিখ্যাত কমেডি ৰিয়েলিটি শ্ব’ বৰ্তমান সম্প্রচাৰিত হোৱা নাই যদিও ইয়াৰ পুনৰ সম্প্রচাৰিত হোৱালৈ অধীৰ আগ্ৰহেৰে ৰৈ আছে দৰ্শকসকল । কৌতুক অভিনেতা কপিল শৰ্মা আৰু তেওঁৰ গোটেই দলটো যোৱা কিছুমাহৰ পৰা ভ্রমণৰ বাবে গৈছিল। তেওঁলোকে আমেৰিকা যুক্তৰাষ্ট্রৰ বিভিন্ন দিশৰ পৰা পোনপটীয়া সম্প্রচাৰো প্রদৰ্শন কৰিছিল । অৱশ্যে এতিয়া সকলো ভাৰতলৈ উভতি আহিছে ।আৰু অনুষ্ঠানটো পুনৰ আৰম্ভ কৰাৰ প্রস্তুতি চলাই আছে । দেওঁবাৰে কপিল শৰ্মাই নিজেই তেওঁৰ নতুন ফটো শ্বেয়াৰ কৰিছিল আৰু তেওঁৰ অনুৰাগীসকলক এই বিষয়ে অৱগত কৰিছিল যে পুনৰ নতুনকৈ অনুষ্ঠান সম্প্রচাৰিত হ’ব । একে সময়তে কপিল শৰ্মাই অনুৰাগীসকলৰ বাবে শ্বেয়াৰ কৰিছিল নতুন লুক ।
যি দেখি সাধাৰণ লোকৰ পৰা চেলিব্রেটিলৈকে সকলোৱে তেওঁক প্রশংসাৰে উপচাই পেলোৱা পৰিলক্ষিত হৈছিল। এই ফটোখন শ্বেয়াৰ কৰি সামাজিক মাধ্যমত কপিল শৰ্মাই লিখিছিল – নতুন ঋতু, নতুন ৰূপ। সোনকালেই আহি আছে দ্য কপিল শৰ্মা শ্ব’ । পিছে এইবাৰ কপিল শৰ্মা শ্ব’ত দেখা নাযাব কৃষ্ণা অভিষেকক । দৰ্শকসকলক জনোৱা হ’ব যে অনুষ্ঠানৰ সফল চৰিত্র ‘স্বপ্না’ এতিয়া নতুন চিজনত দেখা পোৱা নাযাব । পিংকভিলাৰ প্রতিবেদন অনুসৰি শ্ব নিৰ্মাতাসকলে অনুষ্ঠানটোৰ এই চিজনত যথেষ্ট পৰিবৰ্তন কৰিছে । অনুষ্ঠানত দেখিবলৈ পাব বহুতো নতুন শিল্পীক । কৃষ্ণা অনুষ্ঠানটোৰ পৰা বাহিৰ হ’ব । অৱশ্যে, কৃষ্ণা বা অনুষ্ঠানটোৰ কোনোলোকে এই বিষয়ে আনুষ্ঠানিকভাৱে ঘোষণা কৰা নাই । তদুপৰি ঘোষণা হোৱা নাই অনুষ্ঠানটো সম্প্রচাৰিত হোৱাৰ নিৰ্দিষ্ট দিন ।