বহু বিৰ্তকৰ অন্তত দেওবাৰে দেশে লাভ কৰিলে নতুন সংসদ ভৱন। “এক ভাৰত শ্ৰেষ্ঠ ভাৰত” দৰ্শন আগত ৰাখি নিৰ্মাণ কৰা হৈছে নতুন ভৱন। বিট্ৰেছে নিৰ্মাণ কৰা সংসদ ভৱনৰ পৰিৱৰ্তে এতিয়াৰে পৰা নতুন সংসদ ভৱনত প্ৰণয়ন হ’ব আইন। এই অনুষ্ঠানৰ উপলক্ষে প্ৰধানমন্ত্ৰীয়ে স্মৃতিচাৰণ ডাক ডাকটিকট আৰু ৭৫ টকীয়া মুদ্ৰাও মুকলি কৰে। ২০২০ চনৰ ১০ ডিচেম্বৰত অনুষ্ঠিত হোৱা ভূমি পূজন অনুষ্ঠানত নৰেন্দ্ৰ মোদীয়ে বিশেষ ভাৱে আগভাগ লৈছিল।
প্ৰধানমন্ত্ৰী নৰেন্দ্ৰ মোদীৰ দ্বাৰা নতুন সংসদ ভৱনৰ উদ্বোধনক আদৰণি জনাইছে ৰাষ্ট্ৰপতি দ্ৰৌপদী মুৰ্মুৱে। তেওঁ কয় যে, এয়া সমগ্ৰ দেশৰ বাবে গৌৰৱ আৰু অপৰিসীম সুখৰ বিষয়। উদ্বোধনী অনুষ্ঠানত দিয়া বাৰ্তাত ৰাষ্ট্ৰপতিগৰাকীয়ে কয় যে, নতুন সংসদ ভৱনৰ উদ্বোধনী অনুষ্ঠান দেশৰ ইতিহাসত সোণালী শব্দৰে লিখা হ’ব। নতুন সংসদ ভৱনৰ উদ্বোধন ভাৰতৰ সকলো জনসাধাৰণৰ বাবে গৌৰৱ আৰু আনন্দৰ বিষয়। উল্লেখ্য, নতুন সংসদ ভৱনৰ উদ্বোধন উপলক্ষে ৰাষ্ট্ৰপতিয়ে এক লিখিত শুভেচ্ছা বাৰ্তা প্ৰেৰণ কৰে।