ভাৰতীয় নিৰ্বাচন আয়োগে ৰাজহুৱা কৰিলে বৃহত্তম গণতান্ত্ৰীক দেশ ভাৰতৰ ২০২৪ৰ লোকসভাৰ নিৰ্বাচনৰ কেতবোৰ গুৰুত্বপূৰ্ণ তথ্য। নিৰ্বাচন আয়োগৰ দ্বাৰা প্ৰকাশিত এই প্ৰতিবেদনত সন্নিৱিষ্ট হৈ আছে চাৰিখন ৰাজ্যৰ চৈধ্যখনকৈ প্ৰতিবেদন। এই প্ৰতিবেদনত লোকসভা আৰু বিধানসভা অনুসৰি ভোটদাতা, ভোটকেন্দ্ৰ, ভোটাৰৰ হাৰ, দল অনুসৰি প্ৰাপ্য ভোট, পুৰুষ-মহিলা ভোটদাতা আদিৰ ভালেমান তথ্য পোহৰলৈ আহিছে। প্ৰকাশিত এই তথ্য অনুসৰি ২০১৯ বৰ্ষত দেশৰ পঞ্জীয়নভূক্ত ভোটাৰৰ মুঠ সংখ্যা আছিল ৯১.৯১ কোটি, যিটো ২০২৪ বৰ্ষত৭.৪৩ শতাংশ বৃদ্ধি পাই হৈ গৈ ৯৭.৯৭ কোটি। ইয়াৰোপৰি ২০২৪ৰ নিৰ্বাচনত মুঠ ৬৪.৬৪ কোটি ভোটদাতাই কৰিছিল ভোটদান। য’ত মুঠ পুৰুষ ভোটাৰৰ সংখ্যা ৩২.৯৩ কোটি, মহিলা ভোটাৰৰ সংখ্যা ৩১.২৭ কোটি আৰু তৃতীয় লিংগৰ ১৩,০৫৮ ভোটদাতাৰ বিপৰিতে প’ষ্টেল বেলট আছিল ৪২.৮১ লাখ। আনহাতে, ধুবুৰী সমষ্টিত এই নিৰ্বাচনত সৰ্বাধিকসংখ্যক ৯২.৩ শতাংশ ভোটদাতাই ভোটদান সাব্যস্ত কৰিছিল। কিন্তু সৰ্বনিম্ন ভোটদান হৈছিল জম্মু-কাশ্মীৰৰ শ্ৰীনগৰ সমষ্টিত ৩৮.৭ শতাংশ। এই নিৰ্বাচনত ন’টাত ভোটদান কৰা সংখ্যা আছিল ৬৩.৭১ লাখ। মহাৰাষ্ট্ৰত সৰ্বাধিক ১১১ গৰাকী মহিলা প্ৰাৰ্থী অৱতীৰ্ণ হোৱাৰ বিপৰিতে দেশৰ ১৫২ সমষ্টিত মহিলা প্ৰাৰ্থীৰ সংখ্যা আছিল শূন্য। সেইদৰে তেলেংগানা মলকাজগিৰি সমষ্টিত ১১৪ গৰাকী প্ৰাৰ্থীয়ে মনোনয়ন দাখিল কৰাৰ বিপৰিতে ডিব্ৰুগড় সমষ্টিত সৰ্বনিম্ন তিনিগৰাকী।
চলিত বৰ্ষৰ এই নিৰ্বাচনত প্ৰতিদ্বন্দ্বিতা কৰিছিল মুঠ আঠশ গৰাকী মহিলা প্ৰাৰ্থীয়ে, যিটো ২০১৯ চনৰ নিৰ্বাচনত আছিল ৮২৬ গৰাকী। মহাৰাষ্ট্ৰৰ পিচত দ্বিতীয় আৰু তৃতীয় সৰ্বাধিক মহিলা প্ৰাৰ্থী আছিল ক্ৰমে উত্তৰ প্ৰদেশ (৮০) আৰু তামিলনাদু (৭৭)। এই নিৰ্বাচনত ছটা ৰাষ্ট্ৰীয় ৰাজনৈতিক দলে মুঠ ভোটদানৰ ৬৩.৩৫ শতাংশ লাভ কৰিবলৈ সক্ষম হৈছিল।