গুৱাহাটী,১২ এপ্ৰিল: গুৱাহাটী আমবাৰীস্থিত ৰবীন্দ্ৰ ভৱনত সোমবাৰে অনুষ্ঠিত ৫৬সংখ্যক ভাৰতীয় সাহিত্যৰ সৰ্বোচ্চ সন্মান জ্ঞানপীঠ বঁটা গ্ৰহণ কৰিলে ‘গোলাপী জামুৰ লগ্ন’ৰ কবিয়ে ৷
শাৰীৰিক অসুস্থতাৰ বাবে দিল্লীত এই সন্মান গ্ৰহণ কৰিব নোৱাৰা ঋষিতুল্য কবি গৰাকীৰ বাবে ভাৰতীয় জ্ঞানপীঠে অসমতে এই বঁটা প্ৰদানৰ মনস্থ কৰাৰ পিছত ৰাজ্য চৰকাৰৰ সাংস্কৃতিক দপ্তৰে দায়িত্ব লৈ গুৱাহাটীত আয়োজন কৰে বঁটা প্ৰদান অনুষ্ঠান ৷
জ্ঞানপীঠ বঁটা নিৰ্বাচন সমিতিৰ অধ্যক্ষা ড৹ প্ৰতিভা ৰায়, মুখ্যমন্ত্ৰী ড৹ হিমন্ত বিশ্ব শৰ্মা, সাংস্কৃতিক মন্ত্ৰী বিমল বৰা, শিক্ষামন্ত্ৰী ডাঃ ৰণোজ পেগু উপস্থিত থকা অনুষ্ঠানটিত আদৰণি ভাষণ দি কবি গৰাকীৰ কাব্য কীৰ্তিৰ মহত্ব উল্লেখ কৰে লগতে মুখ্যমন্ত্ৰী গৰাকীয়ে ক’লে যে কাব্যঋষিগৰাকীক নিজ হাতেৰে এই সন্মান যাঁচিবলৈ পোৱাতো তেওঁৰ বাবে চৰম সৌভাগ্য লগতে মুখ্যমন্ত্ৰী গৰাকীয়ে উল্লেখ কৰিলে নীলমণি ফুকনদেৱৰ পৰিয়ালৰ অনুমতি পালে কবিগৰাকীৰ সৃষ্টিৰাজীক বিভিন্ন ভাষালৈ অনুবাদ কৰি অসম প্ৰকাশন পৰিষদে বিশ্বৰ বিভিন্ন পাঠকৰ মাজলৈ লৈ যোৱাৰ প্ৰয়াস কৰিব ৷
উল্লেখ্য যে ভাৰতীয় জ্ঞানপীঠ বঁটা লাভ কৰা কবি নীলমণি ফুকন তৃতীয় গৰাকী অসমীয়া সাহিত্যিক ৷