ভাৰত চৰকাৰে দুগৰাকী প্ৰাক্তন প্ৰধানমন্ত্ৰী চৌধুৰী চৰণ সিং, পি ভি নৰসিংহ ৰাও আৰু কৃষি বিজ্ঞানী এম এছ স্বামীনাথনৈ মৰণোত্তৰভাৱে প্ৰদান কৰিলে ভাৰত ৰত্ন বঁটা। প্ৰধানমন্ত্ৰী নৰেন্দ্ৰ মোডীয়ে সামাজিক মাধ্যমৰ জৰিয়তে এই কথা সদৰি কৰে। ইয়াৰ পূৰ্বে ভাৰত চৰকাৰে ভাৰত ৰত্নৰ সন্মানেৰে সন্মানিত কৰিছিল ভাৰতীয় জনটা পাৰ্টিৰ প্ৰাক্তন প্ৰবীন নেতা লাল কৃষ্ণ আদৱানি আৰু বিহাৰৰ প্ৰাক্তন মখুমন্ত্ৰী তথা জননেতা প্ৰয়াত কৰ্পূৰী ঠাকুৰক।
সামাজিক মাধ্যমৰ জৰিয়তে মোদীয়ে কয়- “আমাৰ চৰকাৰৰ সৌভাগ্য যে প্ৰাক্তন প্ৰধানমন্ত্ৰী পি ভি নৰসিংহ ৰাওক ভাৰতবৰ্ষৰ সৰ্বোচ্চ সন্মান ভাৰতৰত্নৰে সন্মানিত কৰা হৈছে। এজন বিশিষ্ট পণ্ডিত আৰু ৰাষ্ট্ৰনেতা হিচাপে নৰসিংহ ৰাও-এ বিভিন্ন পদবীত ভাৰতক সেৱা আগবঢ়াইছিল।” আন এটা পোষ্টত প্ৰধানমন্ত্ৰীগৰাকীয়ে কয়- ”আমাৰ চৰকাৰৰ সৌভাগ্য যে দেশৰ প্ৰাক্তন প্ৰধানমন্ত্ৰী চৌধুৰী চৰণ সিঙকো ভাৰতৰত্নৰ বঁটাৰে সন্মানিত কৰা হৈছে। তেওঁ দেশলৈ আগবঢ়োৱা অতুলনীয় অৱদান দেশবাসীয়ে সদায় মনত ৰাখিব।” এম এছ স্বামীনাথন সন্দৰ্ভত মোদীয়ে কয়- ”তেওঁ কৃষি আৰু কৃষকৰ কল্যাণৰ ক্ষেত্ৰত দেশলৈ যথেষ্ট অৱদান আগবঢ়াইছে। কৃষি আৰু কৃষকৰ কল্যাণৰ ক্ষেত্ৰত আমাৰ জাতিলৈ আগবঢ়োৱা অৱদানৰ স্বীকৃতিস্বৰূপে ভাৰত চৰকাৰে ড০ এম এছ স্বামীনাথনক ভাৰতৰত্ন বঁটা প্ৰদান কৰিছে।”