হেঁপাহৰ ৰঙালী বিহুটিলৈ মাজত মাত্ৰ কেইটামান দিন বাকী। ৰঙালী বিহুৰ প্ৰাক্ক্ষনত অসমবাসীৰ বাবে আহিল সুখবৰ। অসমীয়া গহনাই লাভ কৰিলে মৌলিক সূচাংক অৰ্থাৎ জি আই টেগৰ স্বীকৃতি।এই সুখবৰটি সামাজিক মাধ্যমৰ জৰিয়তে সদৰী কৰিলে মুখ্যমন্ত্ৰী ড০ হিমন্ত বিশ্ব শৰ্মাই।অসমীয়া গহনাক জি আই টেগ প্ৰদানৰ ক্ষেত্ৰত ৰাজ্যৰ কেইবাগৰাকীও থলুৱা ব্যবসায়ীয়ে দীৰ্ঘদিনৰ পৰা অবিৰতভাৱে চেষ্টা চলাই আহিছে।অৱশেষত তেওঁলোকে কষ্টৰ ফল পালে।
বহিঃৰাজ্যৰ পৰা অহা অসমীয়া গহনা আৰু নকল গহনাৰ পয়োভৰ ৰোধৰ ক্ষেত্ৰত এই সিদ্ধান্তই গুৰুত্বপূৰ্ণ ভূমিকা পালন কৰিব।এই খবৰ সামাজিক মাধ্যমত প্ৰকাশ কৰি মুখ্যমন্ত্ৰীগৰাকীয়ে এনেদৰে কয়,” অসমলৈ এক সুখৰ বতৰা কঢ়িয়াই আনিছে অসমীয়া গহনাই।আমাৰ ঐতিহ্য সংস্কৃতিৰ সৈতে অংগাংগীভাৱে জড়িত অসমীয়া গহনাক প্ৰদান কৰা হৈছে ভৌগোলিক সূচাংক অৰ্থাৎ জি আই টেগৰ স্বীকৃতি।মোৰ আজিও মনত আছে ২০১৮-১৯বৰ্ষৰ বাজেট উত্থাপনত আমাৰ শিল্পীসকলৰ সুৰক্ষা আৰু স্বীকৃতিৰ প্ৰতি লক্ষ্য ৰাখি ইয়াৰ বাবে আমি প্ৰস্তাব গ্ৰহণ কৰিছিলো।আমাৰ এই প্ৰস্তাবে আজি ন্যায্যতা পোৱাত সুখী অনুভৱ কৰিছো” লগতে অসমীয়া গহনা উদ্যোগৰ সৈতে জড়িত আটাইকে অভিনন্দন জনোৱাৰ লগতে অসমবাসীকো অভিনন্দন জনাই মুখ্যমন্ত্ৰীগৰাকীয়ে।
সমান্তৰালভাৱে এই খবৰত উৎসাহিত হৈ অসমীয়া গহনাৰ বিশিষ্ট ব্যবসায়ী উৎপল বনিয়াই এনেদৰে কয়, “ অৱশেষত অসমীয়া গহনাই লাভ কৰিছে ভৌগোলিক সূচাংক অৰ্থাত জি আই টেগৰ স্বীকৃতি। ১২ বছৰৰ অবিৰতভাৱে কৰি অহা প্ৰচেষ্টাত আজি বহুত সুখী অনুভৱ কৰিছো।”