চৰকাৰে এইবাৰ অত্যাৱশ্যকীয় মূল্যবৃদ্ধিৰ সমান্তৰালভাৱে স্মাৰ্ট মিটাৰে চলাইছে লুণ্ঠনৰাজ । কেন্দ্ৰৰ নিৰ্দেশ অমান্য কৰি অসমত কৃষকৰ গৃহত সংস্থাপন কৰা হৈছে স্মাৰ্ট মিটাৰ । কেন্দ্ৰীয় চৰকাৰৰ স্পষ্ট নিৰ্দেশ – গ্ৰামাঞ্চলত কৃষকৰ ঘৰত স্মাৰ্ট মিটাৰ লগোৱাতো বাধ্যতামূলক নহয় । গতিকে কেন্দ্ৰৰ নিৰ্দেশ মানি লৈছে বিহাৰ , মণিপুৰ , তামিলনাডু , ত্ৰিপুৰা আদিত । কিন্তু অসমত তাৰ বিপৰীত প্ৰতিচ্ছবিয়ে দেখা গৈছে । বৰ্তমানলৈকে অসমত প্ৰায় ২৩,৩০,০৭৩ টা স্মাৰ্ট মিটাৰ সংযোগ কৰা হৈছে । স্মাৰ্ট মিটাৰ স্থাপন কৰাৰ ফলত গ্ৰাহক – ৰাইজে অত্যাধিক মাচুল ভৰিব লগা হৈছে । যাৰ ফলত তীব্ৰ প্ৰতিবাদ অব্যাহত থকাৰ সময়তে লোকসভাৰ মজিয়াত এই তথ্য পোহৰলৈ আহিছে । প্ৰধানমন্ত্ৰীৰ মোডীৰ ঘনিষ্ট আদানিক সন্তুষ্ট কৰাৰ স্বাৰ্থত যেন অসম চৰকাৰে কেন্দ্ৰৰ নিৰ্দেশক অৱহেলা কৰি এই পন্থা গ্ৰহণ কৰিছে । কেন্দ্ৰীয় শক্তি মনোহৰ লালে লোকসভাত তথ্য দাঙি ধৰাৰ ফলতে এই কথা পোহৰলৈ আহিছে । আনফালে অত্যাধিক বিদ্যুৎ মাচুলত ক্ষোভিত হৈ থকাৰ বিপৰীতে মুখ্যমন্ত্ৰী ড০ হিমন্ত বিশ্ব শৰ্মাই স্মাৰ্ট মিটাৰক লৈ সপক্ষে মন্তব্য দিয়াহে পৰিলক্ষিত হয় । তেখেতৰ মতে স্মাৰ্ট মিটাৰৰ ব্যৱহাৰৰ ফলত বিগত ৯ মাহত ৰাজ্য চৰকাৰে চৰকাৰী কাৰ্য্য়ালয় আৰু শিক্ষানুষ্ঠান আদিত বিদ্যুৎ শক্তিৰ খৰচ প্ৰায় ৩৬ কোটি টকা হ্ৰাস কৰিবলৈ সক্ষম হৈছে বুলি কয় । আনহাতে মেনুৱেল মিটাৰতকৈ স্মাৰ্ট মিটাৰত অত্যাধিক মাচুল ভৰিবলগা হৈছে বুলি ৰাইজে ক্ষোভ উজাৰে ।