সদৌ অসম তাৰ্কিক সন্থাৰ ৰাজ্যিক ভিত্তিক তৰ্ক প্ৰতিযোগিতাৰ ফলাফল ঘোষণাঃ
সদৌ অসম তাৰ্কিক সন্থাৰ উদ্যোগত ৭৫তম স্বাধীনতা দিৱসৰ লগত সংগতি ৰাখি সন্থাৰ চতুৰ্থ বাৰ্ষিক প্ৰতিষ্ঠা দিৱস উপলক্ষে “সদনৰ মতে, সংৰক্ষণ ব্যৱস্থা সমতা আৰু ন্যায়ৰ পৰিপন্থী” বিষয়ত সদৌ অসম ভিত্তিত আয়োজিত “বাক্-যুদ্ধ” শীৰ্ষক প্ৰাইজ-মানি অনলাইন তৰ্ক প্ৰতিযোগিতাত অৰ্ধ শতাধিক প্ৰতিযোগীৰ অংশগ্ৰহণেৰে সফল সমাপ্তি ঘটে ।
১৫আগষ্টৰ আবেলি ৩বজাৰ পৰা নিশা প্ৰায় ৮ বজালৈ প্ৰায় ৫ ঘন্টা যোৰা এই অসম ভিত্তিক মুকলি তৰ্ক প্ৰতিযোগিতাখন উদ্বোধন কৰে জ্যেষ্ঠ অধিবক্তা তথা মঙলদৈ বাৰ্ এচ’ছিয়েছনৰ প্ৰাক্তন সম্পাদক শৈলেন্দ্ৰ কুমাৰ শৰ্মা বৰুৱাই । গুৱাহাটী বিশ্ববিদ্যালয়ৰ এম.এড ফেকাল্টি ড০ বিদুলা শৰ্মাই অধ্যক্ষৰ আসন অলংকৃত কৰা প্ৰতিযোগিতাখনত বিচাৰকৰ আসন শুৱনি কৰে একালৰ সুদক্ষ তাৰ্কিক তথা ইনষ্টিটিউট অফ মাছ কমিউনিকেশ্বনৰ সঞ্চালক মুন তালুকদাৰ আৰু অন্য এগৰাকী সুদক্ষ তাৰ্কিক তথা যুৱ সাংবাদিক নেত্ৰজিৎ বৰাই ।
বিশিষ্ট অতিথি হিচাপে উপস্থিত থাকি তৰ্ক প্ৰতিযোগিতাৰ বিষয়টিৰ প্ৰাসংগিকতা সন্দৰ্ভত মঙলদৈ বিধানসভা সমষ্টিৰ প্ৰাক্তন বিধায়ক গুৰুজ্যোতি দাসে বক্তব্য ৰখাৰ লগতে অসমৰ তৰ্ক জগতৰ উজ্বল নক্ষত্ৰ তথা ৰাধাগোবিন্দ বৰুৱা মহাবিদ্যালয়ৰ ৰাজনীতি বিজ্ঞান বিভাগৰ অধ্যাপক ড০ জিন্টু গোহাঁয়ে তৰ্ক কলাৰ চৰ্চা আৰু গুৰুত্বৰ বিষয়ে ব্যক্ত কৰাৰ উপৰিও সমাজ গঠনত তাৰ্কিকৰ ভূমিকা সম্পৰ্কে কৈ সদৌ অসম তাৰ্কিক সন্থাৰ এই উদ্যোগৰ সলাগ লয় ।
সদৌ অসম তাৰ্কিক সন্থাৰ সম্পাদক তথা তাৰ্কিক প্ৰাঞ্জল প্ৰতিম ডেকা আৰু ৰাজু শৰ্মাই সংবাদ মাধ্যমক এক প্ৰেছ বিবৃতিৰ জৰিয়তে জনোৱা অনুসৰি তৰ্ক প্ৰতিযোগিতাখনিত দৰং কলেজৰ মনোজ কুমাৰ বৰুৱা আৰু জেবি কলেজৰ অঞ্জুমান ভৰদ্বাজৰ দলটোৱে শ্ৰেষ্ঠ দলৰ খিতাপ অৰ্জন কৰাৰ বিপৰীতে ব্যক্তিগত শাখাত নৰ্থ লখিমপুৰ কলেজৰ হিমালক্ষী শইকীয়াই শ্ৰেষ্ঠ তাৰ্কিক, বিশ্বনাথ কলেজ অৱ এগ্ৰিকালচাৰৰ ৰাজশ্ৰী ভৰদ্বাজে দ্বিতীয় শ্ৰেষ্ঠ তাৰ্কিক আৰু মঙলদৈ মহাবিদ্যালয়ৰ দীপাংকৰ ওজাই তৃতীয় শ্ৰেষ্ঠ তাৰ্কিকৰ খিতাপ অৰ্জন কৰিবলৈ সক্ষম হয় ।
তদুপৰি শংকৰদেৱ শিশু বিদ্যা নিকেতন,সোণাৰীৰ পূৰ্বায়ন ক্ষেত্ৰপল,কটন বিশ্ববিদ্যালয়ৰ প্ৰজ্ঞা পৰাশৰ, নগাঁৱৰ ৰামানুজন জুনিয়ৰ কলেজৰ মনস্বী হাজৰিকা, দক্ষিণ কামৰূপ মহাবিদ্যালয়ৰ ৰিমলী ৰিছা পাঠক আৰু যোৰহাটৰ জগন্নাথ বৰুৱা মহাবিদ্যালয়ৰ গৌৰৱ কাশ্যপে উদগণিমূলক বঁটা লাভ কৰিবলৈ সক্ষম হয় ।
উল্লেখ্য যে, অতিশীঘ্ৰেই অংশগ্ৰহণকাৰী সমূহ প্ৰতিযোগীক এখন বিনামূলীয়া তৰ্ক কৰ্মশালাত অংশগ্ৰহণৰ সুযোগ প্ৰদান কৰা হ’ব বুলি সদৌ অসম তাৰ্কিক সন্থাৰ সম্পাদক প্ৰাঞ্জল প্ৰতিম ডেকাই জানিবলৈ দিয়ে ।