অসমীয়া বিহুয়ে স্থান পাব ইউনেস্কোতঃ মন্ত্ৰী বিমল বড়া

Share
অসমীয়াৰ বাপতিসাহোন বিহুটিক আকৌ বিশ্বত‌ অন্যতম ৰূপ দিয়াৰ প্ৰয়াস। বিহুক ৰাজ্য চৰকাৰৰ ইউনেস্কোৰ অস্থাৱৰ সাংস্কৃতিক ঐতিহ্যৰ তালিকাত অন্তর্ভুক্ত কৰাৰ বাবে  প্ৰয়াস।  অসমীয়াৰ বাপতিসাহোন বিহুটিক  UNESCOৰ অস্থাৱৰ বা অস্পৰ্শনীয় সাংস্কৃতিক ঐতিহ্যৰ তালিকাত স্থান প্ৰদানৰ বাবে প্ৰচেষ্টা চলোৱাৰ উদ্দেশ্যে জনতা ভৱনৰ কাৰ্যালয়ত সাংস্কৃতিক মন্ত্রী বিমল বড়াৰ অধ্যক্ষতাত  অনুষ্ঠিত হোৱা এখন গুৰুত্বপূৰ্ণ বৈঠকত এই কথা তেওঁ ব্যক্ত কৰে।
বৈঠকত ৰাষ্ট্ৰসংঘৰ শৈক্ষিক, বৈজ্ঞানিক, সাংস্কৃতিক সংস্থা বা ইউনেস্কোৰ অধীনস্থ ইক’মছ (ICOMOS )ৰ উত্তৰ–পূব মণ্ডলৰ সমন্বয়ক দিলীপ চাংকাকতিয়ে সাংস্কৃতিক ঐতিহ্য তালিকাত বিহু উৎসৱৰ অন্তর্ভুক্তিৰ ক্ষেত্রত থকা নীতি–নিয়মৰ বিষয়ে অৱগত কৰাৰ লগতে এইক্ষেত্ৰত সম্ভৱপৰ সকলোধৰণৰ সহযোগিতা আগবঢ়োৱাৰ আশ্বাস প্ৰদান কৰে।
ইউনেস্কোৰ Intangible Cultural Heritageৰ তালিকাত অন্তর্ভুক্তিৰ ক্ষেত্রত মৌখিক পৰম্পৰা, পৰিৱেশ্য কলা, সামাজিক পৰম্পৰা, জ্ঞান প্ৰসাৰী, ৰীতি–নীতি, উৎসৱ, বিশ্বব্ৰহ্মাণ্ড আৰু প্ৰকৃতিৰে সম্পৰ্কিত কাৰ্য, পৰম্পৰাগত কলা সৃষ্টিকাৰী জ্ঞান আৰু দক্ষতা আদি বিষয় বিবেচনা কৰা হয়। ইতিমধ্যে কুম্ভমেলা, পশ্চিমবংগৰ দুৰ্গা পূজা, মণিপুৰৰ সংকীৰ্তন, ৰাজস্থানৰ কালবেলীয়া নৃত্য কলা, সংস্কৃত নাট, কুটিয়াট্টম, চাও নৃত্যকে ধৰি ভাৰতৰ মুঠ ১৩টা সাংস্কৃতিক পৰম্পৰাই ইউনেস্কোৰ ইনটেঞ্জিবল কালচাৰেল হেৰিটেজত স্থান লাভ কৰিছে।
ইক’মছৰ অহা ডিচেম্বৰত মেলবৰ্ণত অনুষ্ঠিতব্য সভাত যাতে বিহু উৎসৱক ঐতিহ্য তালিকাত অন্তর্ভুক্তিৰ ক্ষেত্রত সঠিকভাৱে উপস্থাপন কৰিব পৰা যায়, ইয়াৰ বাবে সাংস্কৃতিক মন্ত্রী বড়াই যাৱতীয় নথিপত্ৰ প্ৰস্তুত কৰিবলৈ বিষয়াসকলক সভাত নিৰ্দেশ দিয়ে। ইউনেস্কোৰ ইনটেঞ্জিবল কালচাৰেল হেৰিটেজৰ তালিকাত অন্তর্ভুক্ত হ’লে বিহু উৎসৱে বিশ্বজুৰি প্ৰসিদ্ধি লাভ কৰাৰ লগতে ইয়াৰ প্ৰতি বিশ্ববাসীৰ উৎসুকতাও বৃদ্ধি পাব, লগে লগে পৰ্যটনৰ ক্ষেত্রখন সমৃদ্ধ হ’ব।

Leave a Reply

Your email address will not be published. Required fields are marked *