চৰকাৰ বঞ্চনাৰ বিৰুদ্ধে পুনৰ গৰজি উঠে ন্যাৰ্য প্ৰাপ্তিৰ পৰা বঞ্চিত ৰাজ্যৰ টিউটৰ শিক্ষকসকল।চৰকাৰে টিউটৰ শিক্ষকসকলক শিক্ষকৰ মৰ্যাদা প্ৰদান কৰাৰ দাবী কৰি সদৌ অসম সন্মিলিত টিউটৰ মঞ্চৰ উদ্যাগত বৃহস্পতিবাৰে গুৱাহাটীৰ চচলত প্ৰতিবাদী কাৰ্যসূচী ৰুপায়ন কৰা হয়।শ্ৰেণীকোঠা এৰি প্ৰতিবাদত বহা প্ৰতিবাদী টিউটৰ শিক্ষক-শিক্ষয়িত্ৰীসকলে উত্থাপন কৰে বহুতো দাবী।দিনৰ ১১ বজাৰ পৰা আৰম্ভ হোৱা এই প্ৰতিবাদী কাৰ্যসূচীৰ মাজতে ন্যাৰ্য্য অধিকাৰ প্ৰাপ্তিৰ দাবীত চচলৰ ধৰ্ণাস্থলীৰ পৰা দিছপুৰ চলো কাৰ্যসূচী ৰুপায়ন কৰা হয়।তেওঁলোকৰ এই দাবীৰ ভিতৰত আছে টিউটৰ সকলক শিক্ষকলৈ উন্নীত কৰি মৰ্যাদা প্ৰদান কৰা। সমকৰ্মৰ বাবে সমবেতন প্ৰদানৰ ব্যৱস্থা কৰা অৱসৰপ্ৰাপ্ত বা মৃত্যু হোৱা টিউটৰক পূৰ্বে ঘোষণা কৰা মৰ্মে ১০ লাখকৈ টকা গ্ৰেচুইটিৰ ধন প্ৰদানৰ ব্যাৱস্থা কৰা।আনহাতে উল্লেখযোগ্য যে ৰাজ্যৰ তিনিটাকৈ টিউটৰ সংগঠন ক্ৰমে প্ৰাদেশীকৃত মধ্য ইংৰাজী আৰু নিম্ন প্ৰাথমিক টিউটৰ সংস্থা,এক’মডেট টিউটৰ সংস্থা আৰু হাইস্কুল টিউটৰ সংস্থাই একত্ৰিত হৈ অসম সন্মিলিত টিউটৰ মঞ্চ গঠন কৰিছে।পূৰ্ব নিৰ্ধাৰিত কাৰ্যসূচী অনুসৰি ৰাজ্যৰ বিভিন্ন স্থানৰ পৰা সহস্ৰাধিক টিউটৰ আহি পুৱাই চচলত সমবেত হয়।ইয়াৰ পিছতে তেওঁলোকে দাবীৰ সমৰ্থনত শ্ল’গান দিবলৈ আৰম্ভ কৰে।এই শ্ল’গানে পৰিবেশ উত্তাল কৰি তুলে।প্ৰতিবাদী সকলে প্ৰতিবাদস্থলীৰ পৰা দিছপুৰ অভিমুখে আহিব বিচাৰে যদিও আৰক্ষীয়ে তেওঁলোকক বাধা প্ৰদান কৰে।ইয়াৰ ফলত প্ৰতিবাদী সকলে প্ৰতিবাদস্থলীৰ পৰা ওলাই অহাত ব্যাৰ্থ হয়।