অলপতে ৰাছিয়াত হৈ যোৱা ব্ৰিকছ সন্মিলনত আনুষ্ঠানিকভাৱে মিলিত হৈ ভাৰতৰ প্ৰধানমন্ত্ৰী মোদী আৰু চীনৰ ৰাষ্ট্ৰপতি জিনপিঙে দুয়োখন ৰাষ্ট্ৰৰ সীমাত শান্তিৰ পোষকতা কৰিছিল। বিশ্বৰ অন্যতম বৃহৎ দেশ দুয়োখনৰ মাজত দীৰ্ঘদীন ধৰি চলি থকা সীমা বিতৰ্কই বিশ্ব ৰাজনীতিতো বিৰূপ প্ৰভাৱ পেলাই আহিছে। ২০২০ চনৰ গালৱান কাণ্ডৰ পিছত দুয়োখন দেশৰ মাজৰ সম্পৰ্কত পুনৰ ফাঁট মেলিছিল। ২০২২ ত ভাৰতত অনুষ্ঠিত হোৱা জি-২০ ত অংশগ্ৰহণৰ পৰা বিৰত থাকি জিনপিঙে যেন দুয়োখন দেশৰ মাজৰ তিক্ততাকে যেন পুনৰ উদঙাই দিছিল। কিন্তু সদ্যসমাপ্ত ব্ৰিকছ সন্মিলনত দুয়োখন ৰাষ্ট্ৰৰ ৰাষ্ট্ৰপ্ৰধানে মিলিত হৈ সীমাবিবাদৰ সমস্যা সমাধানৰ দিশে কাম কৰিব বুলি প্ৰতিশ্ৰুতিবদ্ধ হয়।
কিন্তু তেনে সময়তে মাৰ্কিন যুক্তৰাষ্ট্ৰৰ প্ৰতিৰক্ষা বিভাগ পেন্টাগনৰ প্ৰতিবেদনে উদঙাইছে চীনৰ দুমুখীয়া স্বৰূপ। প্ৰতিবেদন অনুসৰি, লাডাখৰ পৰা অৰুণাচললৈ ভাৰত-চীনৰ মাজৰ প্ৰকৃত সীমাৰেখা অৰ্থাৎ লাইন অৱ একচুৱেল কন্ট্ৰোলত লক্ষাধিক চীনা সৈন্যৰ অৱস্থিতি ধৰা পৰিছে। ৩,৪৮৮ কিলো মিটাৰ জোৰা এলএচিত চীনৰ পিপলছ লিবাৰেছন আৰ্মীৰ ১.২০ লাখ সেনাৰ সশস্ত্ৰ উপস্থিতিয়ে ভাৰতৰ সুৰক্ষাৰ প্ৰতি ভাবুকি প্ৰদান কৰিছে। কমেও ২০ টা চীনা সৈন্যৰ ব্ৰিগেডে সীমান্তত বাহৰ পাতি থকা খবৰে ভাৰতৰ প্ৰতিৰক্ষা বিভাগত চিন্তাৰ উদ্ৰেক কৰিছে।